Zindagi ki umr bhar maeN justujoo karta raha
Doobte sooraj se shayad guftgoo karta raha
Mujh se barham thi rafoogar ki nazar bhi har ghadi
Daamane dil khud hi kaanton se rafoo karta rahah
Tha ameer e shahr ka kuch ro’ab mujh par is qadar
Zindagi bhar bas qaseede meiN ghuloo karta raha
Dhoop le kar ud gaee phooloN se rang o noor sab
Aur maeN har pal talaash e rang o boo karta raha
Us ki thi aa’dat yaqeenan dosto shab khoon ki
Jaane kiyuN maeN jang us se do ba do karta raha
Pyaas ki shiddat ko maeN ne har ghadi qaboo kiya
Mustarad zaalim ki har ik aab e joo karta raha
Us ke zauq e ishq meiN thi is qadar pakeezgi
Umr bhar Masaud ashkoN se wuzoo karta raha
**************