* Jise bhi qariaa e jaaN ka makeen Karte haeN *
Jise bhi qariaa e jaaN ka makeen Karte haeN
Hum us pa dosto kaamil yaqqN karte haeN
AyaaN hoN jin se hikaayat e zindgi ke ramooz
Ghazal meiN aese mazaameeN zameen karte haeN
Wo zaat e rab hae jo hae sirf qaabil e sajdah
JabeeN ko kab kisi dar ki raheen karte haeN
HumeN yaqeeN hae khiyaanat nahiN kare ga tu
Tujhe hi daulat e dil ka ameen karte haeN
Husool e ilm ka jin ke diloN main jazba hae
Tlaash e ilm meiN wo qasd e Cheen karte haeN
Kabhi jo karta hae wo sakht guftgoo hum se
To apne lahje ko hum aur mateen karte haeN
Karo humesha hi tum baat aesi ae Masaud
Jo sirf ahl e qalam aur zaheen karte haeN
**** |