UuNche uuNche makaan the jin ke 
aaj vuh tang gor meN haiN paRe 
kal jahaaN par shiguufah-o-gul the 
aaj dekhaa to KHaar bi_lkul the 
baat kal kii hai nau-javaan the vuh 
saaHib-i-naubat-o-nishaaN the  jo 
aaj KHvud haiN nah hai makaaN baaqii 
naam ko bhii nahiiN nishaaN baaqii 
GHairat-i-Huur mah-jabiiN nah rahe 
hai makaaN gar to vuh makiiN nah rahe 
kal jo rakhte the apne farq pih taaj 
aaj vuh faatiHah ko haiN muHtaaj 
the jo KHvud-sar jahaan meN mash_huur 
KHaak meN mil gayaa un kaa GHuruur 
'itr maTTii kaa jo nah malte the 
nah kabhii dhuup meN nikalte the 
gardish-i-charKH se halaak hue 
ustuKHvaaN tak bhii un ke KHaak hue 
rashk-i-Yuusuf jo the jahaaN meN HasiiN 
khaa gae un ko aasmaan-o-zamiiN 
har ghaRii munqalib zamaanah hai 
yahii dunyaa kaa kaar-KHaanah hai 
subH ko taairaan-i-KHvush alHaan 
paRhte haiN kull min 'alaiy-haa faan 
maut se kis ko rast-gaarii hai 
aaj vuh kal hamaarii baarii hai