Ik pagli mera naam jo ley, sharmaye bhi, ghabraye bhi,
galiyun galiyun muj se milney aye bhi, ghabraye bhi,

raat gaye ghar janey wali gumsum larki raahon main,
apni uljhi zulfoon ko suljhaye bhi, ghabraye bhi,

kon bichar kar phir lautey ga, kiun awaara phirtey ho?
raaton ko ik chaand muje samjhaye bhi, ghabraye bhi,

aney wali rut ka kitna khauf hai uski aankhon main,
jaaney wala door se haat hilaye bhi, ghabraye bhi,

kia janey woh kon hai Mohsin jis ki khaatir Raaton ko,
taiz hawa pani par naqsh banaye bhi, ghabraye bhi.