Jalta hu'n hijr-e-shahid-o-yad-e-sharab mei'n,
shauq-e-sawab ne mujhe dala azaab mei'n,

kahte hai'n tum ko hosh nahi'n iztarab mei'n,
sare gile tamam hue ek jawab mei'n,

phaili shamim-e-yar mere ashk-e-surKh se,
dil ko ghazab fishar hua pech-o-tab mei'n,

rahte hai'n jama kucha-e-jana'n mei'n khas-o-aam,
abad ek ghar hai jahan-e-kharab mei'n,

badnam mere giriya-e-ruswa se ho chuke,
ab uzr kya raha nigaah-e-behijab mei'n,

matlab ki justaju ne ye kya haal kar diya,
hasrat bhi nahi'n dil-e-nakamayab mei'n,

nakamiyo'n se kam raha umr bhar hamai'n,
piri mei'n yas hai jo hawas thi shabab mei'n,

kya jalwe yaad aaye ke apni khabar nahi'n,
be-bada mast hu'n mai'n shab-e-mahtab mei'n,

paiham sajud pa-e-sanam par dam-e-wida,
"Momin" Khuda ko bhul gaye iztarab mei'n.