* Naavak andaaz jidhar diidaa-e-jaanaa’n honge *
Naavak andaaz jidhar diidaa-e-jaanaa’n honge
niim-bismil kaii honge kaii bejaan honge
taab-e-nazaaraa nahii’n aaiinaa kyaa dekhane duu’n
aur ban jaayenge tasviir jo hairaa’n honge
tuu kahaa’n jaayegii kuchh apnaa Thikaanaa kar le
ham to kal Khvaab-e-adam me’n shab-e-hijaraa’n honge
phir bahaar aaii vahii dasht-e-naavardii hogii
phir vahii paao’n vahii Khaar-e-mughelaa’n honge
naasihaa dil me’n tuu itanaa to samajh apne ke ham
laakh naadaa’n huye kyaa tujh se bhii naadaa’n honge
ek ham hai’n ke huye aise pashemaa’n ke bas
ek vo hai’n ke jinhe’n chaah ke armaan honge
minnat-e-hazarat-e-isaa na thaayenge kabhii
zindagii ke liye sharmindaa-e-ehasaan honge
umr to saarii katii ishq-e-butaan me’n "Momin"
ab aakhirii vaqt me’n kyaa Khaak musalamaa’n honge
|