MAI'N YEH DAAYO'N MOHABBAT KA GANWAA BHI NA SAKOO'N,
APNI QISMAT KO KISI TAUR HARA BHI NA SAKOO'N,
GHAM KE ANMOL KHAZAANE JO ATA US NE KIYE,
MAI'N YEH IK QARZ JO CHAAHOO'N TO CHUKA BHI NA SAKOO'N,
AISI SHIDDAT HAI TAPISH KI KE HAWA KHAAQ WAJOOD,
AAG WOH DIL MEI'N LAGI HAI KE BUJHA BHI NA SAKOO'N,
AISA PEWAST HUA ROOH MEI'N WOH DUSHMANE JAA'N,
MAI'N USE NAZRO'N SE CHAAHOO'N TO GIRA BHI NA SAKOO'N,
FAASLE ITNE BARHENGE YEH KAHAA'N SONCHA THA,
MAI'N SADA DE KE USE AB TO BULA BHI NA SAKOO'N,
US KA EHSAAS MERE JISM SE LIPTA HAI MAGAR,
WOH TO KHUSHBOO HAI USE HAATH LAGA BHI NA SAKOO'N,
DIL PE IK ABR SA CHHAYA HAI NA JAANE KAB SE,
KITNE MOTI HAI'N NAZAR MEI'N JO GIRA BHI NA SAKOO'N,
JANG KARNE KI BHI "MUMTAZ" NAHI TAAB MAGAR,
APNI QISMAT KI LAKIIRO'N KO MITA BHI NA SAKOO'N.