|
* cash ki shakl meN aae jo, wo maal achha hai *
pesh e khidmat haiN Daagh ki zameen par chand ashaar
cash ki shakl meN aae jo, wo maal achha hai
khwaah dinaar o dirham ho, ke riyaal, achha hai
khwaah ho vote ki khaatir, pa koi kaam to ho
democracy meN election ka hi saal achha hai
pahle shaayar the alag, aur gavayye the alag
ban gae aaj to shaayar hi qawal, achha hai
pahle nakarda gunaahoN ki sazaa di, aur ab
press ke saamne karte haiN malaal, achha hai
aur kuchh ye bhi
zindagi chain se marne nahiN deti ham ko
aur kar rakkha hai jeena bhi muhaal, achha hai
ek bechaini si din raat raha karti hai
mere sar par ye mohabbat ka vabaal achha hai
mere haathoN se na sarzad ho koi kaar e haraam
do nivaale hoN, magar rizq e halaal achha hai
dil meN chubhti haiN to jee uthte haiN armaan kai
un ki aankhoN meN ye purlutf kamaal achha hai
ye bhi mulaahiza ho
dar to hai tund hawaa se, pa jataate bhi nahiN
ham charaaghoN ko sar e raah jalaate bhi nahiN
haiN sakhi aap, magar ye to mohabbat hai janaab
ye khazaana to sar e aam lutaate bhi nahiN
ham ko yaadoN ka qafas bhi nahiN manzoor magar
naam likkha hai jo dil par, wo mitaate bhi nahiN
apne hi paas rakheN aap inaayat apni
ham to kamzarfoN ka ehsaan uthaate bhi nahiN
masnooi cheezoN se ham ko hai adaawat kya kya
kaaghzi phooloN ko ham ghar meN sajaate bhi nahiN
yuN to "Mumtaz" mujhe yaad hai har baat magar
ab wo lamhaat mere dil ko dukhaate bhi nahiN
***** |
|