|
* khushi ke khair maqdam meN, ghamoN ko aazmaane meN *
khushi ke khair maqdam meN, ghamoN ko aazmaane meN
bahot takleef hoti hai hameN ab muskraane meN
wafaa ke koh se hasti meN joo e sheer laane meN
rahe masroof ham ab tak muqaddar aazmaane meN
hameN apne tazabtub se agar raahat nahiN hogi
guzar jaaengi sadiyaaN, us ko haal e dil bataane meN
mere maalik, tere saail ka hai daaman tahi ab tak
zara batlaa to de mujh ko, kami kya hai khazaane meN
wo lamhaa, jis meN saari zindagi ki wus'ateN gum thiN
zamaana lag gaya ham ko wo ik lamhaa churaane meN
shikast o fat'h ka ye khel bhi kya khel hai yaaro
mazaa aata hai aksar jeet kar bhi haar jaane meN
kahiN aaghosh e turbat meN hayaat e daaymi bhi hai
kahiN hai zindagi atki nafas ke taane baane meN
kabhi to hasratoN ke daam se "Mumtaz" ham chhooteN
banti jaati hai hasti hasratoN ke khaane khaane meN
**** |
|