|
* farsh tha makhmal ka, lekin teeliyaaN faulaad ki *
farsh tha makhmal ka, lekin teeliyaaN faulaad ki
ho na paaeN ham riha, koshish rahi sayyad ki
marhaba zindadili, sad aafreeN fann e hayaat
ham jahaN pahonche, nai duniya wahaN aabad ki
daam meN aaya junooN ab hasratoN ki khair ho
dil ne phir taskeen ki soorat koi ijaad ki
aey khudaai ke talabgaaro, rahe ye bhi khayaal
ho gai mismaar pal bhar meN iram shaddad ki
ishq ki pukhta imaarat kis qadar kamzor thi
zalzala aaya ke inteN hil gaiN buniyaad ki
jab anaa qatl e tarab ki zid pa aamaada hui
hasratoN ne bakht ke darbaar meN fariyaad ki
kar liya faaqa, pa phailaaya nahiN dast e sawaal
har tarah ham ne bhi rakkhi hai wazaa ajdaad ki
loot leti haiN nashisteN yuN bhi kuchh mutshaairaat
"daad logoN ki, galaa apna, ghazal ustaad ki"
ham junoon e khaam le kar dar ba dar phirte rahe
kis tarah "Mumtaz" ham ne zindagi barbaad ki
**** |
|