|
* MASARRATO'N KI ZAMEE'N PAR YE KAISI SHABNAM HAI *
MASARRATO'N KI ZAMEE'N PAR YE KAISI SHABNAM HAI
GHUBAAR KAISA HAI SEENE ME'N, MUJH KO KYA GHAM HAI
QADAM QADAM PE BICHHE HAI'N HAZAARO'N KHAAR YAHA'N
ZARA SAMBHAL KE CHALO, ROSHNI ABHI KAM HAI
ZARAA JO HANSNE KI KOSHISH KI, AANKH BHAR AAI
SHAGUFTAA KHUSHIYO'N PE MEHROOMIYO'N KA MAUSAM HAI
THAKI THAKI SI TAMANNA, UDAAS UDAAS UMMEED
BUJHA BUJHA SA KAI DIN SE DIL KA AALAM HAI
JALAN SE TAPNE LAGI HAI FIZAA E SEHRA E DIL
HAR EK SAANS MERI ZINDGI KA MAATAM HAI
KHILI KHILI SI HANSI PAR JAMI JAMI SI KHALISH
TARAB KE ZAKHM PE KHUSHFEHMIYO'N KA MARHAM HAI
ABHI HAI QAID ME'N KHUSHBOO, HAI'N RANG AAWAARA
ABHI BAHAAR PARESHAA'N HAI ZEEST BARHAM HAI
NAZAR ME'N DOOBTI JAATI HAI'N ROSHNI KI LAVE'N
YAQEENAN AAJ SITAARO'N KI AANKH BHI NAM HAI
CHAMAN CHAMAN PE UDAASI, SHAJAR SHAJAR GHAMGEE'N
HAR EK SHAAKH PE 'MUMTAZ' ZARD PARCHAM HAI
************************ |
|