EHSAAS E REG E JAA'N ME'N YE SARAAB KA TA'AQQUB
KAB TAK KAROGE AAKHIR IK KHWAAB KA TA'AQQUB
 
HAME'N DE RAHA HAI DHOKA YE HUBAAB KA TA'AQQUB
ABHI UMR KAR RAHI HAI, JO SHABAAB KA TA'AQQUB
 
DIKHLAAE'N JAANE KYA KYA, YE TAQAAZE MASLEHAT KE
KHURSHEED KI TABEEAT, MEHTAAB KA TA'AQQUB
 
YE KARISHMA BHI HAI MUMKIN, JO BALAND HO'N IRAADE
KARTI HAI'N KASHTIYAA'N BHI GIRDAAB KA TA'AQQUB
 
YE JUNOO'N KI AAZMAAISH, YE HAI WAHSHATO'N KI SAAZISH
MUJHE MAAR HI NA DAALE YE AZAAB KA TA'AQQUB
 
KABHI ZEHN DAR BA DAR HAI, KABHI MUNTASHIR TABEEAT
MERA IZTERAAB E PAIHAM, SEEMAAB KA TA'AQQUB
KABHI KOI PAL SUKOO'N KA NA HUA NASEEB MUJH KO
MERI ZINDAGI MUSALSAL SAILAAB KA TA'AQQUB
 
TUJHE TOD DEGA AAKHIR YE TERA JUNOON E BE JAA
'MUMTAZ' TARK KAR DE NAYAAB KA TA'AQQUB
******************