* YE KHALA KAISA HAI DIL MEN ZEHN KYUN MAILA HUA *
YE KHALA KAISA HAI DIL MEN ZEHN KYUN MAILA HUA
KYA HUE EHSAAS SAARE DARD KO YE KYA HUA
KIS TARAF JAAUN BADI ULJHAN MEN HAI ZEHN O NAZAR
IK PAHELI KI TARAH HAI RAASTA ULJHA HUA
KHWAAB DIKHLA KAR SUNEHRE SAARI KHUSHIYAN LOOT LE
AASMAA.N YAARO KOI QAZZAQ HAI PAHONCHA HUA
DIL TO TOOTA, HASRATEN TO PARA PARA HAIN MAGAR
MIT GAIN SAB ULJHANE.N YE BHI CHALO ACHCHHA HUA
HAM TO SAMJHE THE KE YAADO.N KA WO DARIYA SAR HUA
YE KHALISH SI KYUN HAI AB PHIR DARD KYUN ZINDA HUA
IS SAFAR MEN HAM BAHOT AAGE NIKAL AAE MAGAR
HAM KO ULJHAAE HAI AB TAK WAQT WO BEETA HUA
HO GAYA HAI IS MEN BHI SHAAYAD KAHIN KOI SHIGAAF
BEHISI KE GHAAR SE IK KHWAAB HAI RISTA HUA
AAJ SHEHR E AARZOO MEN KYUN YE HULCHUL MACH GAI
DAF'ATAN KYUN KHAUL UTTHA AABJU THEHRA HUA
US KO KHAT MEN LIKH DIYA HAI DIL KA IK IK WAAQYA
KUCHH SUKOO.N DIL KO HUA KUCHH BOJH TO HALKA HUA
IS SARAAB E ZAAT MEN KYA JUSTJU US KI KAREN
US KO DEKHE BHI HAMEN 'MUMTAZ' IK ARSA HUA
***************** |