* ZARA ZARA SA MAZAA BHI HAI DIL KE QEENE MEN *
ZARA ZARA SA MAZAA BHI HAI DIL KE QEENE MEN
YE MEETHI MEETHI KHALISH KYUN HAI AAJ SEENE MEN
NASEEB MEN THA LIKHA DOOBNA TO YUN BHI HUA
SURAAKH HO GAYA PATWAAR SE SAFEENE MEN
CHHUPA KE ZAKHMON KO RAKHNA TO HAM NE SEEKH LIYA
MAHEK LAHOO KI GHULI REH GAI PASEENE MEN
HAI BESHQEEMTI DAULAT MAGAR HAI JAA.N LEWA
PALE HAIN NAAG MOHABBAT KE IS KHAZEENE MEN
SHARAAB SE BHI ZIYAADA KHUMAAR HAI IN MEN
MAZAA AJEEB SA AATA HAI ASHK PEENE MEN
QUSOOR KYA THA MERA KYUN HAYAAT ROOTH GAI
KAMI TO KOI KABHI KI NA HAM NE JEENE MEN
CHAMAK TO AISI KE AANKHON MEN CHUBH RAHI HAI MAGAR
ZARA SA KHOT BHI HAI DIL KE IS NAGEENE MEN
JO MUNKASHIF HO TO HASTI KO ZER O BAM KAR DE
WO RAAZ DAFN HAI "MUMTAZ" IS DAFEENE MEN
******************** |