نعت پاک

وجودِ آدمِ نوری کی ابتدا وہ تھا
عروجِ آدمِ خاکی کی انتہا وہ تھا

اسی کی شان میں رطب اللساں ہے ہر ذرّہ
خدا کی ساری خدائی کا مقتدا وہ تھا

فدا نہ کیوں ہوں جن و انس اور فرشتے بھی
کہ جس سے عشق خدا کو بھی ہوگیا وہ تھا

برائے وصل تھی معراج ورنہ پہلے بھی
رموزِ خالقِ باری سے آشنا وہ تھا

اگر ہو عشقِ محمدؐ تو کائنات بنے
جو لفظِ کن میں تھی پوشیدہ وہ صدا وہ تھا

عیاں تھے سینۂ اطہر سے رازِ سربستہ
وہ شہرِ علم تھا ہر علم کی بنا وہ تھا

ہزار ظلم سہے اور بددعا بھی نہ کی
جو سب کے واسطے رحمت تھا مصطفیٰؐ وہ تھا

ممتاز نکہت

701, Unique Apt., 10, New Lane Street
Dock Yard Road, Mumbai-400010
Mob: 9833151471
بشکریہ ’’عندلیبانِ طیبہ‘‘ مرتب: مشتاق دربھنگوی
……………………………………