Bhar diya aankh mein khushiyo-n bhara manzar kaisa

Uski socho-n ne kiya chehra munawwar kaisa

Meri yaadei-n bhi kahi-n kho gayin meri tarha-n

Ho gaya jaane mere baad mera ghar kaisa

Thi bazahir badi khamosh meri tanhayi

Shor machta raha jaane mere andar kaisa

Kar diya pehle hamein kaanch sa nazuk tu ne

ab tere haath mein aey zindgi paththar kaisa

apne honto-n ki hansi yaad na aayi mujhko

ghamzada kar gaya mujhko ye muqaddar kaisa

***********************