* اے دلِ پُرخوں یہ کیسی بے بسی ہے آج ک *
اے دلِ پُرخوں یہ کیسی بے بسی ہے آج کل
ہر کوئی محرومِ حسنِ زندگی ہے آج کل
آدمی رکھتا ہے یوں تو ساری دنیا کی خبر
بے خبر بس آدمی سے آدمی ہے آج کل
بہہ رہا ہے خون انسانوں کا پانی کی طرح
سوچئے تو کتنی ارزاں زندگی ہے آج کل
کیا عجب ہے وہ پیامِ انقلابِ وقت ہو
ساری دنیا میں جو ہلچل سی مچی ہے آج کل
میرے غم کی کیفیت کا کون اندازہ کرے
اک خلش جو میرے سینے میں دبی ہے آج کل
کاروانِ زیست کیوں کر پائے منزل کا نشاں
گمرہی کی دھول ہرسو اڑ رہی ہے آج کل
یوں نگاہیں پھیر لی ہیں اُس بتِ طناز نے
ہر خوشی مشتاقؔ سے روٹھی ہوئی ہے آج کل
***************** |