چتا جب آرزو کی میرے دل میں جل رہی ہوگی
مری آنکھوں میں آنسو ، اُس کے ہونٹوں پر ہنسی ہوگی

گرفتارِ محبت کیا کوئی یوں ہی ہوا ہوگا؟
کسی کے حسنِ دل افروز کی جادوگری ہوگی

کہیں مسجد پہ حملہ ہے کہیں پتھرائو مندر پر
بھلا اس حال میں مقبول کس کی بندگی ہوگی

کوئی تو آنکھ مل کر یاد ہم کو کررہا ہوگا
ہمارے گائوں میں جب صبح کوئل کوکتی ہوگی

جنہوں نے روتے روتے زندگی اپنی گزاری ہے
خدایا اُن غریبوں کو میسر کب ہنسی ہوگی

جنابِ شیخ کیا دعویٰ کریں گے پارسائی کا
انہوں نے بھی کسی کی مدھ بھری آنکھوں سے پی ہوگی

میں آدھی رات تک پھر آج اپنے گھر نہیں لَوٹا
مری ماں شام ہی سے راہ میری تک رہی ہوگی

کرے گا کون اے مشتاقؔ توبہ ایسے عالم میں
گھٹا ساون کی میخانے پہ جب چھائی ہوئی ہوگی
******************