* رخسار و زلف و چشمِ بتاں کچھ نہ پوچھ *
رخسار و زلف و چشمِ بتاں کچھ نہ پوچھئے
الجھا ہے میرا ذہن کہاں کچھ نہ پوچھئے
کیسے جلا ہے خرمنِ جاں کچھ نہ پوچھئے
اُن کی نگاہِ شعلہ فشاں کچھ نہ پوچھئے
آئیں گے جب وہ بام پہ ناز و ادا کے ساتھ
اُس وقت کا حسین سماں کچھ نہ پوچھئے
ملتے ہیں سنگِ میل کی صورت کہاں نہیں
اُس پائے نازنیں کے نشاں کچھ نہ پوچھئے
یوں اُن کی چشمِ ناز کا مجھ پر ہوا اثر
ہر آرزو ہے دل کی جواں کچھ نہ پوچھئے
مثلِ شکستہ آئینہ ٹوٹے پڑے ہیں لوگ
انجامِ کاروبارِ جہاں کچھ نہ پوچھئے
مشتاقؔ رازدارِ محبت ہے میرا دل
کیا کچھ ہے میرے دل میں نہاں کچھ نہ پوچھئے
*************** |