اَن چھوئے ساز کا اَن سُنا گیت ہے
جانے تو کس کا چھیڑا ہوا گیت ہے

گل کھلاتی ہوئی رنگ بھرتی ہوئی
تو ہے یا زندگی رقص کرتی ہوئی
خامشی بھی تیری، پیار کا گیت ہے
جانے تو کس کا چھیڑا ہوا گیت ہے

تیری پرچھائیں سے دھوپ کے پر جلیں
تیری رفتار بجتی ہوئی پائلیں
تیری انگڑائی کا ٹوٹنا گیت ہے
جانے تو کس کا چھیڑا ہوا گیت ہے

ایسا ناتا نہ ہو گا کسی اور سے
سن رہی ہیں ہوائیں بڑے غور سے
تو فضاؤں میں اِک گونجتا گیت ہے 
جانے تو کس کا چھیڑا ہوا گیت ہے