* آنکھ جو بھی سرِ بازار دکھاتی ہے مج *
آنکھ جو بھی سرِ بازار دکھاتی ہے مجھے
ہیں قیامت کے سب آثار بتاتی ہے مجھے
کامرانی ہے مرے نام سے شاید منسوب
’’پھر کوئی منزلِ دشوار بلاتی ہے مجھے‘‘
میں پلٹ آئونگا کیا تیری طرف اے دنیا
اپنی پائل کی جو جھنکار سناتی ہے مجھے
آئینہ آج انا الحق کا دکھانے کے لئے
روحِ منصور سرِ دار بلاتی ہے مجھے
چاند تارے بھی چھپا لیتے ہیں منہ بادل میں
یاد تیری جوشب تار رُلاتی ہے مجھے
میں اِدھر، بیچ میں دریا، اُدھر میری قضا
آج اِس پار سے اُس پار بلاتی ہے مجھے
ہم نشیں، ہم سخن و، ہم وطن و میں مضطرؔ
سرخرو نرمئی گفتار بناتی ہے مجھے
***************************** |