حمد

کرتے نہیں بیان کچھ اپنی زباں سے ہم
باہر تجھے سمجھتے ہیں لفظ و بیاں سے ہم

شاید کوئی بتائے ترا کچھ پتہ نشاں
پوچھا کئے زمیں سے کبھی آسماں سے ہم

دل کے ورق پہ نام ترا داستاں تری
واقف نہیں ہیں اور کسی داستاں سے ہم

دریا ہوں ، کوہسار ہوں ، صحرا کہ بستیاں
گزرے تری تلاش میں کون و مکاں سے ہم

تیرا کرم ہے تیری عنایت ہے بے نیاز
کہہ دیں گے صاف صاف یہ سارے جہاں سے ہم

دامانِ صبر ہاتھ سے چھوٹا نہیں نسیم
لیتے نہیں ہیں کام کچھ آہ و فغاں سے ہم

نسیم نیازی

Flat No. 403, J-3/17, Akash Apartments
Murti Wali Gali No.7, Laxmi Nagar, Delhi-92
Mob: 9999654439 , 9811646228
بشکریہ ’’غزالانِ حرم‘‘ مرتب: مشتاق دربھنگوی
……………………………………