غزل

مصروفیت کے خانوں میں ہم ایسے بٹ گئے
غیروں کی بات کیا ہو کہ اپنوں سے کٹ گئے

سائے میں جن کے بیٹھ کے لیتے تھے دم غریب
ایسا ہوا کہ پیڑ ہی وہ جڑ سے کٹ گئے

کیوں کر فروغ جھوٹ کو ملتا نہ اس قدر
ہم لوگ سچ کے راستے سے خود ہی ہٹ گئے

دیکھا کسی نے پائوں کو باہر نہ آج تک
چادر پڑی جو چھوٹی تو خود ہی سمٹ گئے

چھالے ہمارے پائوں کی رفتار دیکھ کر
جب دے سکے نہ ساتھ تو بے چارے پھٹ گئے

فائقؔ مشاہدے کی ہے یہ بات ، مان لے
دولت بڑھی تو لوگوں کے اخلاق گھٹ گئے

نسیم فائق

170, Keshab Chandra
Sen Street (Raja Bazar)
Kolkata-700009
Mob: 9874893562 /9231671664
******