* Teri ankhiyoN ko takeiN roz ghazalaN janaN *
Teri ankhiyoN ko takeiN roz ghazalaN janaN
Aur tire lab se jale laal e badakhshaN janaN
Is qadar sakht hai mujh par gam e douraN janaN
Gardish e waqt ke hathoN se hooN raqsaN janaN
Sar hai sajde meiN magar lab pe hai janaN janaN
Hum sa kafir na koi hoga MusalmaN janaN
Dard e dil, dard e jigar jaan na le le meri
Ik tera lams hai is dard ka darmaN janaN
Raah rou kitne rah e shouq meiN himmat haare
Manzil e ishq ka rasta nahiN aasaN janaN
Apni har chah ka ghonta hai gala khud maine
Dil meiN baqi nahiN ab koi bhi armaN janaN
Khouf e duniya se maiN khamosh to rehta hooN magar
Dil ki dhadkan se sada aaye hai janaN janaN
Sar e shoreeda jhuka hai na jhukega Nasir
Humne duniya ka uthhaya nahin ihsaN janaN.
Nasir Amrohvi |