Nida Fazli wrote this nazm at the death of his father. He was not able to reach the burial because of some problems, and he paid his tribute to his father in this nazm.

Tumhaarii qabr par main,
faatehaa paRhne nahiiN aayaa,
mujhe m’aaluum thaa, tum mar nahiiN sakte.,
tumhaare maut kii sachchii Khabar,
jisne uRhaa’ii thii, wo jhuuTaa thaa,
wo tum kab the?
koiii suukhaa huaa pattaa, havaa meN gir ke TuuTaa thaa.,
merii aaNkheN
tumhaare manzaroN meN qaid hai ab tak,
maiN jo bhii dekhtaa huN, sochtaa huN,
vo, vohii hai
jo tumhaarii nek-naamii aur bad-naamii ki duniyaa thii,
kahiiN kuch bhi nahiiN badlaa,
tumhaare haath, merii uNgliyoN meN saaNs lete haiN,
maiN likhne ke liye jab bhii, qalam kaaGaz uThaataa huN,
tumhe baiThaa huvaa main,
apnii hi kursii meN paataa huN,
badan meN mere, jitnaa bhi lahuu hai,
wo tumhaarii
laGhzishoN, naa-kaamiyoN ke saath bahtaa hai,
merii aavaaz meN chhup kar, tumhaaraa zehn rehtaa hai,
meri biimaariyoN meN tum,
meri laa-chaariyoN meN tum,
tumhaari qabr par jis ne tumhaaraa naam likhkhaa hai,
wo jhuTaa hai,
tumhaari qabr meN, maiN dafn huN,
tum zindaa ho !
tum zindaa ho !
mile fursat kabhii, tau faatehaa paRhne chale aanaa..