Jaane vaaloN se raabitaa rakhnaa,
dosto rasm-e-faatihaa rakhnaa,
(raabitaa : contact; faatihaa : a prayer for the dead)
ghar kii ta’amiir chaahe jaisii ho,
is meN rone kii kuch jagah rakhnaa,
(ta’amiir : construction)
masjideN haiN namaaziyoN ke liye,
apne ghar meN kahiiN Khudaa rakhnaa,
(namaazii : people who pray)
jism meN phailne lagaa hai shah’r,
apnii tanhaaiyaaN bachaa rakhnaa,
(tanhaa’ii : loneliness)
‘umr karne ko hai pachaas ke paar,
kaun hai kis jagah, pataa rakhnaa.