Jaha'n Na Teri Mahak Ho Udhar Na Jau'n Mai'n, 
meri sarisht safar hai guzar na jau'n mai'n,

mere badan me'n khule jangalo'n ki mitti hai, 
mujhe sambhal ke rakhana bikhar na jau'n mai'n,

mere mizaj me'n be-mani ulajhane'n hai'n bahut, 
mujhe udhar se bulana jidhar na jau'n mai'n,

kahi'n pukar na le gahari vadiyo'n ka sabut, 
kisi maqam pe akar Thahar na jau'n mai'n,

na jane kaun se lamhe ki bad-dua hai ye, 
qarib ghar ke rahu'n aur ghar na jau'n mai'n.