Har Gharhi Khud Se Ulajhna Hai Muqaddar Mera,
mai'n hi kashti hu'n mujhi me'n hai samandar mera,

kisse puchhu'n ki kaha'n gum hu'n barson se, 
har jagah Dhundhta phirta hai mujhe ghar mera,

ek se ho gae mausamo'n ke chehare sare, 
meri ankho'n se kahi'n kho gaya manzar mera,

muddate'n biit gai Khvab suhana dekhe, 
jagta rahta hai har nind me'n bistar mera,

aina dekh ke nikla tha mai'n ghar se bahar, 
aaj tak haath me'n mahfuuz hai patthar mera,