* Apnii marzii se kahaaN apne safar ke ham haiN *
Apnii marzii se kahaaN apne safar ke ham haiN
RuKh havaaoN kaa jidhar kaa hai udhar ke ham haiN
Pahle har chiiz thii apnii magar ab lagtaa hai
Apne hii ghar meN kisii duusre ghar ke ham haiN
Vaqt ke saath hai miTTii kaa safar sadiyoN se
Kisko maaluum kahaaN ke haiN kidhar ke ham haiN
Chalte rahte haiN k chalnaa hai musaafir kaa nasiib
Sochte rahte haiN kis raahguzar ke ham haiN
GintiyoN meN hii gine jaate haiN har daur meN ham
Har qalamkaar kii benaam khabar ke ham haiN
*** |