|
* Main roya pardes mein, bheegaa maaN kaa pyaar *
Main roya pardes mein, bheegaa maaN kaa pyaar
Dukh ne dukh se baat ki, bin chit_thhi bin taar!!!!
Chhotaa kar ke dekhiye jeevan kaa vistaar
AankhoN bhar aakaash hai, baahoN bhar sansaar
Leke tan ke naap ko, ghoomay basti gaanv
Har chaadar ke gher se, baahar nikalay paanv
Sab ki poojaa ek si, alag alag hai reet
Masjid jaaye maulavi, koyal gaaye geet
Puja ghar mein murti Meera k sang Shyam
Jiski jitni chaakari, utne uske daam
Nadiyaa seenchay khet ko, tota kutray aam
Sooraj Thekedaar saa, sab ko baantay kaam
Saaton din bhagwaan ke, kyaa mangal kyaa peer
Jis din soye der tak, bhookhaa rahay faqeer
Achhi sangat baithkar, sangi badalay roop
Jaisay milkar aam se meethii ho gayi dhoop
Sapnaa jharnaa neend kaa, jaagii aankhen pyaas
Paanaa, khonaa, khojanaa saanson kaa itihaas
Chaahay Geetaa baanchiye, yaa padhiye Quraan
Mera tera pyaar hi har pustak kaa gyaan
Raste ko bhi dosh de, aankheN bhi kar laal
Chappal me jo keel hai, pahle use nikaal
Seedha sada dakiya, jadu kare mahaan
Ek hi thaile me rakhe, aansu aur muskan
Bachchah bola dekh k masjid aalishaan
Allah tere ek ko itna baRa makaan???
*** |
|