نیا سال امن و اماں ساتھ لائے
کہ سارا جہاں پیار کے گیت گائے

نئی ہو امنگیں ، ترنگیں نئی ہوں
نیا حوصلہ دل میں سب کے جگائے

زمانے کو ہو راحتِ جاں میسر
کہ پھر شانتی امن کا دور آئے

ہوئے حادثے جو نہ ہوں وہ دوبارہ
نہ انسان انساں کے گھر کو جلائے

سکوں سے رہیں لوگ سارے جہاں میں
نہ ہرگز کسی پر کوئی ظلم ڈھائے

سبھی کے لبوں پر رہے مسکراہٹ
کوئی بے بسی پر نہ آنسو بہائے

نیا سال لائے نگارؔ اتنی خوشیاں
کہ ماضی کا غم ہر بشر بھول جائے
****************