اندھیرے میں امیدوں کی نہ ہم شمعیں جلائیں گے
کبھی بھولی ہوئی یادیں نہ اپنے دل میں لائیں گے

ہماری زندگانی سے اجالے چھیننے والے
تمہارے گھر میں اک دن تیرگی ہم بن کے آئیں گے

تمہیں یہ قمقمیں ، شمعیں ، دیئے سب کچھ مبارک ہوں
اندھیرا دور کرنے کو ہم اپنا دل جلائیں گے

جو آنکھیں تم چراتے ہو تو پھر اتنا بتا دینا
کہ جب ہم روبرو ہوں گے نظر کیسے ملائیں گے

ابھی جاتے ہیں ہم کو روک لو آواز دے کر تم
کہ عمرِ رفتہ کی مانند ہم واپس نہ آئیں گے

نہ ہوگا آپ سے کچھ بھی کہ اس دنیا میں روز و شب
فقط باتیں بناتی ہیں فقط باتیں بنائیں گے

کوئی موسم نہیں ہیں ہم کہ جاکر پھر نہ ہم آئیں
بلائوگے ہمیں جب پیار سے ہم لوٹ آئیں گے

نگارؔ اپنا نہیں کچھ بھی زمیں بھی آج دشمن ہے
تو کیا ہم اپنی دنیا آسمانوں پر بسائیں گے
******************