Jahanzaad, niiche galii meiN tere dar ke aage,
ye maiN soKhta-sar, Hasan kuuzagar huuN,
tujhe subh baazaar meN buuRhe attar Yusuf,
ki dukaan par maiN ne dekha,
to terii nigaahoN meiN wo taabnaakii,
thii maiN jis kii hasrat meN nau saal diivaana phirtaa rahaa huuN,
Jahanzad, nau saal diivaana phirtaa rahaa huuN,
ye vo daur thaa jis maiN meN ne,
kabhii apne ranjuur kuuzoN kii jaanib,
palaT kar na dekha …
vo kuuze mere dast-e-chaabuk ke putle,
gil-o-rang-o-rauGhan kii makhluuq-e-bejaaN,
vo sargoshioN meN ye kahte,
“Hasan kuuzagar ab kahaN hai,
vo ham se, Khud apne ‘amal se,
Khudavand ban kar KhudaaoN kii maanind hai ruu-e-gardaaN,
Jahanzad, nau saal kaa daur yuuN mujh pe guzraa,
ke jaise kisii shahr-e-madfuun par vaqt guzre,
taGhaaroN meN miTTi,
kabhi jis ki Khushbuu se vaarafta hotaa thaa main,
sang-basta paRii thii,
suraahii-o-miina-o-jaam-o-subuu aur faanuus-o-guldaaN,
merii hech-maaya ma’iishat ke, izhaar-e-fan ke sahaare,
shikasta paRe the,
maiN Khud, maiN Hasan kuuzagar, paa-ba-gil, Khaak bar sar, barahna,
sar-e-chaak zhauliida-muu, sar ba zaanu,
kisii Gham-zada devtaa kii tarah vaahma ke,
gil-o-laa se KhvaaboN ke sayyal kuuze banaataa rahaa thaa,
Jahanzad, nau saal pahle,
tu naadaN thii lekin tujhe ye Khabar thii,
ke maiN ne, Hasan kuuzagar ne,
teri qaaf kii sii ufaq taab aankhoN,
meiN dekhii hai vo taabnaakii
ke jis se mere jism-o-jaan, abr-o-mahtaab kii,
raah-guzar ban gaye raat,
vo raud-e-Dajla kaa saahil,
vo kashtii, vo mallaah kii band aankheN,
kisii Khasta-jaaN, ranj bar kuuzagar ke liye,
aik hi raat vo kahrubaa thii,
ke jis se abhi tak hai paivast us kaa vajuud …
us kaa paikar,
magar aik hi raat kaa zauq daryaa kii vo lehr niklaa,
Hasan kuuzagar jis meN Duuba to ubhraa nahiiN hai!
Jahanzad, is daur meN rauz, har rauz,
vo sauKhta-baKht aa kar,
mujhe dekhtii chaak par paa-ba-gil, sar ba zaanu
to shaanoN se mujh ko hilaatii …
vuhii chaak jo saal-haa-saal jiine ka tanhaa sahaara rahaa thaa,
vo shaanoN se mujh ko hilaatii,
“Hasan kuuzagar, haush meN aa,
Hasan, apne viiran ghar par nazar kar,
ye bachchoN ke tannuur kyonkar bhareN ge,
Hasan, ai muhabbat ke mare,
muhabbat amiiroN kii baazi,
Hasan apne diivar-o-dar par nazar kar,
mere kaan meN ye nava-e-haziiN yuuN thii jaise,
kisii Duubte shaKhs ko zer-e-gardaab ko’ii pukaare,
vo askhoN ke anbaar phuuloN ke anbaar the haaN,,
magar maiN, Hasan kuuzagar, shehr-e-auhaam ke un,
KharaaboN kaa majzuub thaa jin,
meN koi sadaa, ko’ii jumbish,
kisii murGh-e-parraaN kaa saaya
kisii zindagii kaa nishaaN tak nahiiN thaa,
Jahanzad, maiN aaj terii galii meN,
yahaaN raat kii sard-guuN tiirgii meN
tere dar ke aage khaRaa huuN
sar-o-muu pareshaan,
dariiche se vo qaaf kii sii tilismii nigaaheN
mujhe aaj phir jhaanktii haiN,
zamaana, Jahanzad, vo chaak hai jis pe miina-o-jaam-o-subu aur faanuus-o-guldaan,
ke maanand bante bigaRte hain insaaN,
maiN insaaN huuN lekin,
ye nau saal jo Gham ke qaalab meN guzre,
Hasan kuuzagar aaj ek tauda-e-kaak hai jis meN nam ka asar tak nahiN hai,
Jahanzad, baazaar meiN subh’ ‘attar Yusuf,
kii dukkan par teri aankheN,
phir ek baar kuchh kah gayii haiN,
un aankhoN ki taabinda shoKhii,
se uTThi hai phir tauda-e-Khaak meN nam kii halkii sii larzish,
yahii shaayad is Khaak ko gil banaa de !
tamanna kii vus’at kii kis ko Khabar hai, Jahanzad, lekin,
tu chaahe to ban jauuN maiN phir,
vuhii kuuza-gar jis ke kuuze,
the har kaaKh-o-ku aur har shahr-o-qariya kii naazish,
the jin se amiir-o-gadaa ke masaakin daraKhshaaN
tamanna ki vus’at kii kis ko Khabar hai, Jahanzad, lekin
tu chahe to maiN phir palaT jauuN un apne mehjuur kuuzoN ki jaanib,
gil-o-laa ke suukhe taGhaaroN ki jaanib,
ma’iishat ke izhaar-e-fan ke sahaaroN kii jaanib,
ke maiN us gil-o-laa se, us rang-o-roGhan,
se phir vo sharaare nikaaluuN ke jin se,
diloN ke Kharaabe hoN raushan!