Dil ko sehra kijiye, aankhon ko darya kijiye
Is tarha bhi aik din apna tamaasha kijiye

Mauj-e-sar'sar ka koi jhonka uRa lay jaayega
Reit ki deewaar par kab tak bharosa kijiye

Ik zara si baat say sheeshay mein aa jaata hay baal
Baat mein talkhi sahi, ooncha na bola kijiye

Waqt ki raig-e-rawaan say naqsh saaray mitt gaye
Apnay qadmon kay nishan muR kar bhi daikha kijiye

Kuch tumharay zakhm hain, kuch apni mehroomi kay zakhm
Kis ko pinhaan kijiye, kis ko haweida kijiye

Zindaqi kab tak hareef-e-shorash-e-darya rahay
Is safeenay ko kisi din gharq-e-darya kijiye