umar bhar ka de gaya koi situm-gar sochna
us se mil kar sochna us se bichhar kar sochna

jis ko dekho.n us ke chehrey par lakeerain soch ki
jaisy ho jaey kisi shey ka muqaddar sochna

shakh-i-gul hota to deewaro.n se tuj ko jhankta
ab to sab ko dekhna aur ankh bhar kar sochna

raat khwabo.n main kai dhundley manazir dekhna
din ki tanhai main un khwabo.n ka aksar sochna

toot-ta rehta hoon pehro.n main tazad-o-karb se
apney bahr muskarana apney andar sochna

main parinda hoon kisi din shakh se urr jao.n ga
phir gai guzri ruton ka moj-i-sarsar sochna