Ai meri hamraqs mujh ko tham le
Zindagi se bhag kar aya hun main
Dar se larazan hun kahin aisa na ho
Raqsgah ke chor darawaze se akar zindagi
Dhundh le mujh ko nishan pa le mera
Aur jurm e aish karate dekh le

Ai meri hamraqs mujh ko tham le
Raqs ki ye gardishen 
Ek mubaham asiya ke daur hain
Kaisi sargarmi se Gam ko raundata jata hun main
Ji may kahata hun ki han
Raqsgah may zindagi ke jhankane se peshtar
Kulfaton ka sangreza ek bhi rahane na paye

Ai meri hamraqs mujh ko tham le
Zindagi mere liye 
Ek Khuni bheriye se kam nahi
Ai hasin o ajanabi aurat usi ke Dar se main
Ho raha hun lamha lamha aur bhi tere qarib
Janata hun tu meri jan bhi nahi
Tujh se milane ka phir imkan bhi nahi
Tu meri arazuon ki magar tamsil hai
Jo rahi mujh se gurezan aj tak

Ai meri hamraqs mujh ko tham le
Ahad e parina ka main insan nahi
Bandagi se is dar o diwar ki
Ho chuki hain Khwahishen be soz o rang o natawan
Jism se tere lipat sakata to hun
Zindagi par main jhapat sakata nahi
Is liye ab tham le
Ai hasin o ajanabi aurat mujhe ab tham le