* MaiN kiske naam likhuuN jo alam guzar rahe haiN *
MaiN kiske naam likhuuN jo alam guzar rahe haiN
mere shahar jal rahe haiN, mere log mar rahe haiN
koii Ghuncha ho ki gul koii shaaKh ho shajar ho
vo havaa-e-gulistaaN hai ki sabhii bikhar rahe haiN
kabhii rahmateN thii naazil isii Khitta-e-zamiiN par
vahii Khitta-e-zamiiN hai ki azaab utar rahe haiN
vahii taaeroN ke jhurmuT jo havaa meN jhuulte the
vo fizaa ko dekhte haiN to ab aa bhar rahe haiN
koii aur to nahiiN hai pas-e-Khanjar-aazmaaii
hamiiN qatl ho rahe haiN, hamiiN qatl kar rahe hain |