* Bahaar mosam meN ghanta Aagey *
Bahaar mosam meN ghanta Aagey
KhazaaN ke mosam meN ghanta peechey
ham apni gharhyoN ki sooiyoN ko, ghuma phira ke
shab e siah se kaseed kartey heN
saateeN chand roshni ki
magar, ye dil aur zehn apney
shab e siah se kaheeN ziada kaseef zulmat meN at gaey heN
kadooratooN aur adawatooN ke azab mosam meN ghir gaey heN
kabhi jo in sey kaseed kar leN
ham ek lamha bhi chahatooN ka
to apni jaaN pe ham hans ke seh leN
itaab sarey, azaab sarey |