Dukhe hue hain humein aur ab dukhao mat
Jo hogaye ho fasana tu yaad aao mat
khayal o khuab mein perchayian si nachti hain
Ab is tarah tu meri rooh mein samao mat
Zamee'n key log tu kia do dilon ki chahat mein
Khuda bhi ho tu ussey dermian lao mat
Tumhara sar nahi tiflaan e rehguzer key liye
Diyar e sang mein gher sey nikal key jao mat
Siwaye apney kisi key bhi ho nahi saktey
Hum aur log hain logon humein satao mat
Humarey ehed mein yeh rasm e aashiqui thehri
Faqeer ban key raho aur sada lagao mat
Wohi likho jo lahu ki zabaa'n sey milta hai
Sukhan ko perda e alfaaz mein chupao mat
Supurd ker he dia aatish e huner key tu phir
Tamam khak he hojao kuch bachao mat
Obaid Ullah Aleem
دکھے ہوئے ہیں ہمیں اور اب دکھاؤ مت
جو ہوگئے ہو فسانہ تو یاد آؤ مت
خیال و خواب میں پرچھائیاں سی ناچتی ہیں
اب اس طرح تو مری روح میں سماؤ مت 
زمیں کے لوگ تو کیا دو دلوں کی چاہت میں
خدا بھی ہو تو اُسے درمیان لاؤ مت
تمھارا سر نہیں طفلانِ رہ گزر کے لئے
دیارِ سنگ میں گھر سے نکل کے جاؤ مت
سوائے اپنے کسی کے بھی ہو نہیں سکتے
ہم اور لوگ ہیں لوگو ہمیں ستاؤ مت
ہمارے عہد میں یہ رسمِ عاشقی ٹھہری
فقیر بن کے رہو اور صدا لگاؤ مت
وہی لکھو جو لہو کی زباں سے ملتا ہے
سُخن کو پردہء الفاظ میں چھپاؤ مت
سُپرد کر ہی دیا آتشِ ہنر کے تو پھر
تمام خاک ہی ہوجاؤ کُچھ بچاؤ مت
*****