bin tere kya kahe.n kya rog hamei.n yar laga

Dar lage naam liye jis ka wo aazar laga

sab ye kahte hai.n mujhe tujh se jo dil yar laga

hae kya is ko jawani mei.n ye aazar laga

hum diwano.n ka ye hai dasht-e-junu.n mei.n rutba

ki qadam rakhte hi aa pa.nw se har khaar laga

kahiye kyu.nkar na use baadshah-e-kishwar-e-husn

ki jaha.n ja ke wo baiTha wahi.n darbar laga

qadr phir apni ho kya us ke kharidaro.n mei.n

roz-o-shab jis ki gali mei.n rahe bazar laga

kaun sa din wo kaTa mujh pe ki ai tegh-e-firaq

zakhm ek taza mere dil pe na har bar laga

dil mei.n ab us ke jo lahr aai hai ghar jaane ki

tu bhi rone ki jhaDi dida-e-khuu.n-baar laga

muttasil tu jo mera khuun-e-jigar pita hai

kyu.n gham-e-ishq ye kya tujh ko mazedar laga

tez-dasti-e-junu.n aaj hai aisi hi ki bas

na raha apne gareba.n mei.n koi tar laga

is zami.n mei.n ghazal ek aur bhi paDh ai 'jurat'

khoob andaz ke ab kahne tu ashaar laga

*****************