* میرے واقعات وفا ہیں وہ کہ جہانِ عش *
میری فصلِ گُل نہ ہوئی کیا، میرا باغباں نہ ہوا تو کیا
مجھے اعتبارِ قفس تو ہے اگر آشیاں نہ ہوا تو کیا
میرے واقعات وفا ہیں وہ کہ جہانِ عشق سمجھ گیا
میرا نام مصلحتاً اگر سرِ داستاں نہ ہوا تو کیا
مجھے اب چمن سے غرض ہے کیا کہ اسیرِ کنج قفس ہوں میں
میرا آشیاں جو ہوتا تو کیا میرا آشیاں نہ ہوا تو کیا
یہ جگر پہ ہاتھ یہ آنکھ نم کہو بات کون سی چُھپ گئی
جو میری زبان سے فسانۂ شب غم بیاں نہ ہوا تو کیا
سرِ چرخ چاندبھی چھپ گیا سرِ شام شمع بھی بُجھ گئی
شبِ ہجر کٹ گئی اے قمرؔ کوئی مہرباں نہ ہوا تو کیا
|