Ye kah kar diye merii qismat men naale 
tumhaarii amaanat tumhaare havaale

bas itaanii hai duurii ye manzil hai ye main huun 
kahaan aake phuute hain paaon ke chhaale

karuun aisaa sajdaa vo ghabaraa ke kah den 
Khudaa ke liye ab to sar ko uthaa le

mariiz-e-shab-e-Gham kii saans aaKhirii hai 
charaagh-e-sahar le rahaa hai sambhaale

kabhii mar bhii chuk ai mariiz-e-muhabbat 
pareshaan baiThe hain ghar jaane vaale

qayaamat hain zaalim kii niichii nigaahen 
Khudaa jaane kyaa ho jo nazaren uThaa le

"Qamar main huun muKhtar tanziim-e-shab kaa 
hain mere hii bas men andhere ujaale