mange hai tere milne ko be-tarah se dil aaj
kal kya hai jo milna hai meri jaa.n tu mil aaj
phir subh se aashob-e-qayamat hai jaha.n mei.n
chehre pe tere kin ne banaya hai ye til aaj
ai girya tu khatir se meri kijo na sarfa
mai.n khuun-e-dil-khasta kiya tujh pe bahil aaj
chahe hai agar kal ko teri nashw-o-numa ho
dil khol ke dane ki tarah khak mei.n ril aaj
kya sina jo taDpho.n ko nigah ki teri jhele
is tir se rah jae na faulad ki sil aaj
ya-rab na paDe asl se apni koi ya.n dur
ye aab tha sab jitni ki dekhe hai tu gil aaj
'qayem' ye ghazab kal to na TuTe tha tere par
dekha hai kahi.n tin wo but-e-mehr-gusil aaj
۸۸۸۸۸۸۸۸۸۸۸۸۸۸