پُرانے سال کے ٹُکڑے شُمار کرتے ھُوئے
مَیں رو پڑا ھُوں  دھماکے شمار کرتے ھُوئے
۔۔
جہانِ خواب پہ شب خُون  مارنے والے
مُجھے بھی گنتے ھیں لاشے شُمار کرتے ھُوئے
 
یہاں تو شہرِ سُخن کاٹنے کو پڑتا ھے
فقیر تھک گیا ، کُتے شُمار کرتے ھُوئے
 
کبھی کبھی تو مُجھے گِنتی بھول جاتی ھے
خُود اپنے قتل کے فتوے شُمار کرتے ھُوئے
 
مُجھے یہاں کوئی مُجھ سا نظر نہیں آتا
میں تھک گیا ھُوں" فرشتے" شُمار کرتے ھُوئے
 
کَھرے بھی پھینک دئیے مَیں نے ساتھ کھوٹوں کے
وُہ طیش آیا ھے، سِکے شمار کرتے ھُوئے
 
وھاں بھی اپنے سوا کُچھ نظر نہیں آیا
جہاں گیا تھا، زمانے شُمار کرتے ھُوئے
 
میں اپنے خواب کی کھڑکی  میں سانس لیتا تھا
سپاھی آئے  دریچے شُمار کرتے ھُوئے

 ھزار ھم سے کِھنچو تُم، ھزار ھم سے بچو
ادھر ھی آو گے"شُعلے "شُمار کرتے ُھوئے
 
وُہ ھنس پڑے انہیں پڑھ کر تو کام بن جائے
میں رو پڑا ھُوں جو مصرعے شُمار کرتے ھُوئے
 
اُڑان بھرنے کی کوشش نہ کر ، گِرے گا میاں
زمیں پہ بھاگ ۔۔۔ پرندے شُمار کرتے ھُوئے
 
وُہ زلزلوں میں دُعائیں سُنا نہیں کرتا 
جسے پُکارا ھے جھٹکے شُمار کرتے ھُوئے
 
خُدایا بُھول نہ جانا اِدھر مری مٹی
جہانِ خاص کے حِصے شُمار کرتے ھُوئے
 
جُھکے ھُوئے مرے ماتھے کا یہ سوال بھی سُن   
تھکا نہیں ھے تُو ، سجدے شُمار کرتے ھُوئے
 
اب آئینے سے ھٹوں ، اور لمبی آہ بھروں
خزاں میں پیڑ کے پتے شُمار کرتے ھُوئے
*******