* مَیں یہاں موجود ھُوں اور تُو یہاں *
مَیں یہاں موجود ھُوں اور تُو یہاں موجود ھے
اک خلا پھر کیوں ھمارے درمیاں موجود ھے
نہ ھوا موجود ھے نہ بادباں موجود ھے
اک سفینہ ھے کہ جس کا امتحاں موجود ھے
بَر درو دیوار ، مرگِ ناگہاں موجود ھے
ایسے موقع کے لئے حُکمِ اذاں موجود ھے
سر یہ کہتا ھے کہ اُس پر کُچھ نہیں موجود اب
دل یہ کہتا ھے کہ سر پر آسماں موجود ھے
آنکھ کی پُتلی کو کیا کم ظرف سمجھا ھے میاں
اس سِیَہ نُقطے میں ساری کہکشاں موجود ھے
جانتا ھُوں یہ دُعا مقبول تو ھونی نہیں
خُوش رھے میری بَلا سے جو جہاں موجود ھے
معذرت! اس تلخی گوئی کا سبب مَیں ھُوں مگر
آپ کی جانب فضا میں کُچھ دُھواں موجود ھے
******* |