تُمھاری ھاں میں  ذرا ھاں ملانے والا ھُوں
وگرنہ مَیں  کہاں پینے پلانے والا ھُوں
 
 
تمام لوگ الاو کے پاس آ جائیں
ذرا سی دیر میں مَیں، کُود جانے والا ھُوں
 
 
نکل کے اوٹ سے آجا کہ بات چیت کریں
جو ھو گیا مَیں اُسے بُھول جانے والا ھُوں
 
 
نہ تخلیئے میں بُلا اسطرح سے شہزادی
فقط غلام ھُوں ، جُھولا جُھلانے والا ھُوں
 
 
یہ دیکھ مَیں نے تو آنسو بھی پونچھ ڈالے ھیں
کہاں لبوں پہ کوئی بات لانے والا ھُوں
 
 
جھپک کے آنکھ  سراسر غلط کیا مَیں نے
چراغ سمجھا اُسے چھوڑ جانے والا ھُوں
 
 
یہ اضطراب جو میرے بدن میں برپا ھے
یہ بات وُہ ھے جسے مَیں چُھپانے والا ھُوں
 
 
خبر نہیں کہ کہیں آسماں رھے نہ رھے
میں اب یہ نیلگُوں آنسو بہانے والا ھُوں
 
 
ضرور کوئی غلط فہمی ھوگئی ھے جناب
نیا نہیں ھُوں، وھی مَیں پُرانے والا ھُوں
 
 
دُکان دار دُکانیں بڑھا گئے ھیں کیا
تو کیا اکیلا مَیں کوزے بنانے والا ھُوں
 
 
یہ بُزدلی نہیں حکمت ھے کیوں سمجھتا نہیں
مَیں اپنے گھر میں اکیلا کمانے والا ھُوں
 
 
کسی مدد کی ضرورت نہیں مُجھَے بھائیو  
یہ خآک میری ھَے خود مَیں اُڑانے والا ھُوں
 
 
نشستِ خاص  کسی اور کے  لئے رکھ چھوڑ
مَیں رُکنے والا نہیں ھُوں ، مَیں جانے والا ھُوں
 
*******