اُن بزرگوں کے مزاروں کی  کوئی خیر خبر
دیجئے عشق کے ماروں کی کوئی خیر خبر
 
 
چاند کا قصہ ، ستاروں کی کوئی خیر خبر
میرے بچھڑے ھوئے یاروں کی کوئی خیر خبر
 
 
میرے اطراف کی زردی میں کوئی سبز  لکیر
تیرے ھمراہ بہاروں کی کوئی خیر خبر
 
 
ھجر کے سارے گرفتار  کہاں پیش ھوئے
عشق کے خفیہ اداروں کی کوئی خیر خبر
 
 
وُہ جو موجود تھے لیکن کہیں موجود نہیں
سینکڑوں اور  ھزاروں کی کوئی خیر خبر
 
 
رہ بدلنے پہ مرے ساتھ نہ اُڑنے والے
اُن پرندوں کی قطاروں کی کوئی خیر خبر
 
 
کوئی افلاک سے کُچھ میرے لئے بھی لایا
ھے مرے برق سواروں کی کوئی خیر خبر
 
 
جھولتے جسم کو تکتی ھوئی کھائی کا پتہ
چھت کے بوسیدہ کناروں  کی کوئی خیر خبر
 
 
اب وھاں تُو بھی نہیں مَیں بھی نہیں کُچھ بھی نہیں
آئے کیا اُجڑے دیاروں کی کوئی خیر خبر
 
 
جو محبت کی زباں کاٹ کے خود گُونگے بنے  
کون دے ایسے گنواروں کی کوئی خیر خبر
 
 
ناصر و احمد  و زریون و ندیم و ذاکر  
اخترِ نو !  مرے پیاروں کی کوئی خیر خبر
 
*******