* لوگ سب قیمتی پوشاک پَہن کر ملیں گے *
لوگ سب قیمتی پوشاک پَہن کر ملیں گے
ھم تو خوشبو سے یہی خاک پَہن کر ملیں گے
رُوح کے ساتھ اگر ملنا نہیں ھے ھم کو
پھر تو ھم خواھشِ ناپاک پَہن کر ملیں گے
تُم پہ سجتے ھیں ستاروں بھرے کپڑوں کے لباس
ایسا کرتے ھیں کہ افلاک پہن کر ملیں گے
تُمھیں رھتا ھے ھمیشہ جو جھجھکنے کا ملال
اس لئے پیرھنِ بے باک پہن کر ملیں گے
میرے شُعلے میں ھی مدغم ھو تُمھارا شُعلہ
اک ارادہ یہ خطرناک پہن کر ملیں گے
ھم اکیلے نظر آئیں گے رضآ مجمعے میں
کج کُلاہِ زرِ ادراک پہن کر ملیں گے
****** |