* خٔود کو دُوں گا مَیں سزا ایسی کہ سب *
نظر آتے ھیں وُہ آثار اب انشاءاللہ
آگ اُگلیں گے یہ کُہسار اب انشاءاللہ
ھم جنہیں سایہءِ دیوار میں بے چینی ھے
ھم پہ گِر جائے گی دیوار اب انشاءاللہ
مَیں بھی تقدیر کے لکھے پہ یقیں کر لُوں گا
مَیں بھی ھوجاوں گا بیکار اب انشاءاللہ
خٔود کو دُوں گا مَیں سزا ایسی کہ سب یاد رکھیں
خود لگاوں گا مَیں دربار اب انشاءاللہ
راکٹوں اور جہازوں سے جو لڑنا ھے مُجھے
اک خریدوں گا مَیں تلوار اب انشاءاللہ
مَیں بھی سُقراط کی تعریف کئے جاتا ھُوں
مَیں نے ھونا ھے گرفتار اب انشاء اللہ
بحرِ مُردار کے اُس پار کنارہ نہیں ھے
واپس اُتروں گا اِسی پار اب انشاءاللہ
بُتِ کافر ھے ؟ مُسلمان ھے کیا ھے؟ یا رب!۔
کہے جاتا ھے مرا یار اب انشاءاللہ
ماشاء اللہ! مکیں تھک گئے روتے روتے
روئیں گے خود دَر و دیوار اب انشاء اللہ
نہیں دیکھوں گا مَیں اُڑتے ھُوئے خوابوں کی قطار
دل میں مَر جائے گی یہ ڈار اب انشاءاللہ
عقل کوتاہ سہی اُس کے مداوے کے لئے
سر پہ باندھوں گا مَیں دستار اب انشاءاللہ
آسماں راہ تو دینے سے رھا مُجھ کو رضآ
خاک اُڑاوں گا مَیں ھر بار اب انشاء اللہ
******* |