* Mai apnii bulandi ko bhii khokar nahii girta *
Mai apnii bulandi ko bhii khokar nahii girta
toota hua tara hoo'n zamee'n per nahii girta
her shaakh se jarh phoot ke girtii hai zamee'n mei'n
bargad hoo'n mai'n aandhii mei'n ukhar kar nahii girta
woh perh samardaar kahii ghar mei'n nahii hai
aangan mei'n mere ab koii paththar nahii girta
is mahfile yaara'n se agar jaate ho to jaao
ek ei'nt khisakne se kabhii ghar nahii girta
lagta hai kisi teer se majrooh hua hai
warna teri chhat pe woh kabootar nahii girta
was'at hii kaha'n hai ke samajaye kisi tarah
is waste nadiyo'n mei'n samndar nahii girta
har roz bachata hoo'n mai khud ko yaha'n 'Rahmat'
kaise kahoo'n sar per koii patther nahii girta
|